Муҳоҷир: модарони олам хостори сулҳ ҳастанд!

Худованд дар қатори ҳазорҳо нафар ҷавонони муҳоҷир орзуи деринаи бачаи деҳотиро амалӣ гардонд. Ин ҳам бошад, кӯшиши кор ба давлати Русия буд. Кор дар Русия бароям афсонаеро мемонд, амалинашаванда. Лек чӣ хеле, ки дар халқ мегӯянд: "Худо диҳад бачаи кӣ намегӯяд".

Тӯли зиндагонӣ дар давлати бегона чӣ қадар азобу машаққат кашидам. Ман зиндагиамро дар ду давлат муқоиса карда, руҳан азоб мекашидам ва ба саволҳои худ посух дода наметавонистам. Танҳо ба хулосае омадам, ки зисту зиндагонӣ дар ҳар гӯшаву канори дунё якранг нест, махсусан рӯзгор ва қисмати модарони мо. Модари тоҷик маро ба дунё овардаву модари рус маро чанде дар хонааш сарпаноҳ дода. Албатта, модаре ки маро зодаву ба воя расонд ҳамеша дар гӯшаи хотирам буд.

Ҳарду модар соли 1951 дар як сайёра, ҳазорҳо километр аз ҳам дур таваллуд шуда, имсол ба синни 66- солагӣ расиданд. 66 соле, ки барои яке танҳо таззоду ташвиш буду барои дигаре пур аз хотираҳои ширин.

Рӯзе дар рӯ ба рӯям ду сурати модаронро ба ҳам гузоштаму зиндагии нимасраи онҳоро муқоиса кардам ва дидам, чӣ қадар ташвишу таззоде:

Модари тоҷикам дар замоне ба дунё омадааст, ки Иттиҳоди Шӯравй баъди ҷанги дуввуми ҷаҳонӣ кӯшиш ба пешрафт дошт. Мардум ҳама барои барқарор кардани иқтисодиёти давлат ба меҳнат ҷалб гардиданд. Аз ҳама бори вазнин бар дӯши бошандагони саҳро буд, зеро маҳз ба туфайли меҳнати онҳо дастурхони мардум обод мешуд.

Дар радифи дигар ҳамсолонаш модарам низ дар синни 6-солагӣ ба кори саҳро ҷалб гардид. Мактабро то синфи 6-ум хонда, пас аз ду сол ба падарам ба шавҳар баромад. Аз он лиҳоз, ки арӯси фарзанди калонӣ буд, нигоҳубин, шустани сарулибос ва омода кардани хӯрок барои ҳашт фарзанди хонаводаи шавҳар бар дӯшаш буд. Касе "духтараки хурд"-гӯён навозиш намекард. Ба гуфти худаш, аз меҳр сер нашуд, зеро ӯро аз домони модар ҷудо намуда, хонаи шавҳар бурданд.

Ҳангоме ки модари тоҷик соҳиби се фарзанд шуд ҳамсоли ӯ-Наташа Соколова бо беҳтарин шароит ба донишгоҳи олии Русия дохил гардид. Баҳри хониш волидонаш тамоми шароитҳоро фароҳам оварданд. Вақте ӯ соли саввуми таҳсил бо ҳамсари ояндааш дар боғҳои шаҳри Маскав сайругашт мекард, ҳамсолаш дар Тоҷикистон фарзанди чорумашро интизорй мекашид. Наташа бошад, пеш аз ҳама, дар хаёли шахсият будан дар ҷамъият буд.

Модари руссам дар синни 29-солагӣ ба шавҳар баромад, вале модари тоҷикам дар ин замон соҳиби шаш фарзанд гардид. Модари ҷонам ба хотири гирифтани унвони баланди Шӯравй- "Қаҳрамонмодар" боз ҳафт фарзанди дигар тавлид намуд. Се нафараш фавтиданду 10 фарзанди боқимондааш имрӯз бо пойи равони хеш ӯро ғарқи ғаму андӯҳ ва қоматашро хам намуданд. Модари руссам бошад, соҳиби се фарзанд аст: ду писару як духтар. Имрӯз ба суратҳисобаш маблағҳо ворид месозанд.

Замоне, ки Наташа Соколова бо киштии тозаихтироъ уқёнуси Оромро ҳамроҳи фарзандонаш тамошо мекард, модарам тифли хурдиашро болои маркаб нишонда, ба деҳаи ҳамсоя назди модаркалонам мерафт. Нигоҳубини даҳ фарзанд, харидани сару либос, хӯрок, оиладор намудан ба рӯйи модари тоҷикам аз худ ожангҳоеро боқй гузошт. У барвақт пиру барҷомонда гашт.

Дар рӯи модари руссам ожанге ҳувайдо нест. Як фарзандаш дар бонки давлати Олмон, дигаре дар ширкати Амрико ва саввумӣ дар Итолиё кору зикдагӣ дорад. Наташа ҳар бегоҳ, бо ду фарзандонаш тавассути интернет сӯҳбат намуда, бо дугонаҳояш шабнишинй меорояд. Ба хотири хурсандии кӯдакони маъюб ҳаргуна чорабиниҳои фароғатй мегузаронад.

Модари тоҷики ман бошад, даме дар назди курсии сахти кӯча бо дугонаҳояш нишастан фурсат намеёбад. Баъзан онҳоро дар кӯча вохӯрда, аз қисмати талхи бархе аз фарзандонаш ҳасрат мекунад. У айни замон, ба нафақа баромадааст ва пули ночизе мегирад. Бо арӯсону наберагонаш дар интизори маблағи фарзандонаш менишинад. Ҳамеша дар намози худ баҳри фарзандон дуо мегӯяд, ки сиҳату бардам аз Русия баргарданду Ватан ҳамеша ободу хуррам бошад.

Наташа Соколова ҳам ба мисли модарам аст. Рӯзи якшанбе ба серков рафта, барои сарбози рус, ки дар Сурия ҳалок гаштааст ашк рехта, шамъ мегиронад ва хостгори сулҳу амният аст.

Новобаста ба ин ҳама таззодҳо хушбахт аз онам, ки ҳарду модар бо тафовутҳои зиёд тарафдори сулҳу оромй дар ҷаҳон ҳастанд.

Икром Саидов

Таҳияи Зебоҷон Қурбонова